Search

śrī-śuka uvāca tataḥ prācetaso ’siknyām anunītaḥ svayambhuvā ṣaṣṭiṁ sañjanayām āsa duhitṝḥ pitṛ-vatsalāḥ

daśa dharmāya kāyādād dvi-ṣaṭ tri-ṇava cendave bhūtāṅgiraḥ-kṛśāśvebhyo dve dve tārkṣyāya cāparāḥ

nāmadheyāny amūṣāṁ tvaṁ sāpatyānāṁ ca me śṛṇu yāsāṁ prasūti-prasavair lokā āpūritās trayaḥ

bhānur lambā kakud yāmir viśvā sādhyā marutvatī vasur muhūrtā saṅkalpā dharma-patnyaḥ sutāñ śṛṇu

bhānos tu deva-ṛṣabha indrasenas tato nṛpa vidyota āsīl lambāyās tataś ca stanayitnavaḥ

kakudaḥ saṅkaṭas tasya kīkaṭas tanayo yataḥ bhuvo durgāṇi yāmeyaḥ svargo nandis tato ’bhavat

viśve-devās tu viśvāyā aprajāṁs tān pracakṣate sādhyo-gaṇaś ca sādhyāyā arthasiddhis tu tat-sutaḥ

marutvāṁś ca jayantaś ca marutvatyā babhūvatuḥ jayanto vāsudevāṁśa upendra iti yaṁ viduḥ

mauhūrtikā deva-gaṇā muhūrtāyāś ca jajñire ye vai phalaṁ prayacchanti bhūtānāṁ sva-sva-kālajam

saṅkalpāyās tu saṅkalpaḥ kāmaḥ saṅkalpajaḥ smṛtaḥ vasavo ’ṣṭau vasoḥ putrās teṣāṁ nāmāni me śṛṇu

droṇaḥ prāṇo dhruvo ’rko ’gnir doṣo vāstur vibhāvasuḥ droṇasyābhimateḥ patnyā harṣa-śoka-bhayādayaḥ

prāṇasyorjasvatī bhāryā saha āyuḥ purojavaḥ dhruvasya bhāryā dharaṇir asūta vividhāḥ puraḥ

arkasya vāsanā bhāryā putrās tarṣādayaḥ smṛtāḥ agner bhāryā vasor dhārā putrā draviṇakādayaḥ

skandaś ca kṛttikā-putro ye viśākhādayas tataḥ doṣasya śarvarī-putraḥ śiśumāro hareḥ kalā

vāstor āṅgirasī-putro viśvakarmākṛtī-patiḥ tato manuś cākṣuṣo ’bhūd viśve sādhyā manoḥ sutāḥ

vibhāvasor asūtoṣā vyuṣṭaṁ rociṣam ātapam pañcayāmo ’tha bhūtāni yena jāgrati karmasu

sarūpāsūta bhūtasya bhāryā rudrāṁś ca koṭiśaḥ raivato ’jo bhavo bhīmo vāma ugro vṛṣākapiḥ

ajaikapād ahirbradhno bahurūpo mahān iti rudrasya pārṣadāś cānye ghorāḥ preta-vināyakāḥ

prajāpater aṅgirasaḥ svadhā patnī pitṝn atha atharvāṅgirasaṁ vedaṁ putratve cākarot satī

kṛśāśvo ’rciṣi bhāryāyāṁ dhūmaketum ajījanat dhiṣaṇāyāṁ vedaśiro devalaṁ vayunaṁ manum