Search

na vai te ’jita bhaktānāṁ mamāham iti mādhava tvaṁ taveti ca nānā-dhīḥ paśūnām iva vaikṛtī

śrī-śuka uvāca ity uktvā yajñiye kāle vavre yuktān sa ṛtvijaḥ kṛṣṇānumoditaḥ pārtho brāhmaṇān brahma-vādinaḥ

dvaipāyano bharadvājaḥ sumantur gotamo ’sitaḥ vasiṣṭhaś cyavanaḥ kaṇvo maitreyaḥ kavaṣas tritaḥ

viśvāmitro vāmadevaḥ sumatir jaiminiḥ kratuḥ pailaḥ parāśaro gargo vaiśampāyana eva ca

atharvā kaśyapo dhaumyo rāmo bhārgava āsuriḥ vītihotro madhucchandā vīraseno ’kṛtavraṇaḥ

upahūtās tathā cānye droṇa-bhīṣma-kṛpādayaḥ dhṛtarāṣṭraḥ saha-suto viduraś ca mahā-matiḥ

brāhmaṇāḥ kṣatriyā vaiśyāḥ śūdrā yajña-didṛkṣavaḥ tatreyuḥ sarva-rājāno rājñāṁ prakṛtayo nṛpa

tatas te deva-yajanaṁ brāhmaṇāḥ svarṇa-lāṅgalaiḥ kṛṣṭvā tatra yathāmnāyaṁ dīkṣayāṁ cakrire nṛpam

haimāḥ kilopakaraṇā varuṇasya yathā purā indrādayo loka-pālā viriñci-bhava-saṁyutāḥ

sa-gaṇāḥ siddha-gandharvā vidyādhara-mahoragāḥ munayo yakṣa-rakṣāṁsi khaga-kinnara-cāraṇāḥ

rājānaś ca samāhūtā rāja-patnyaś ca sarvaśaḥ rājasūyaṁ samīyuḥ sma rājñaḥ pāṇḍu-sutasya vai menire kṛṣṇa-bhaktasya sūpapannam avismitāḥ

ayājayan mahā-rājaṁ yājakā deva-varcasaḥ rājasūyena vidhi-vat pracetasam ivāmarāḥ

sūtye ’hany avanī-pālo yājakān sadasas-patīn apūjayan mahā-bhāgān yathā-vat su-samāhitaḥ

sadasyāgryārhaṇārhaṁ vai vimṛśantaḥ sabhā-sadaḥ nādhyagacchann anaikāntyāt sahadevas tadābravīt

arhati hy acyutaḥ śraiṣṭhyaṁ bhagavān sātvatāṁ patiḥ eṣa vai devatāḥ sarvā deśa-kāla-dhanādayaḥ

yad-ātmakam idaṁ viśvaṁ kratavaś ca yad-ātmakāḥ agnir āhutayo mantrā sāṅkhyaṁ yogaś ca yat-paraḥ

eka evādvitīyo ’sāv aitad-ātmyam idaṁ jagat ātmanātmāśrayaḥ sabhyāḥ sṛjaty avati hanty ajaḥ

vividhānīha karmāṇi janayan yad-avekṣayā īhate yad ayaṁ sarvaḥ śreyo dharmādi-lakṣaṇam

tasmāt kṛṣṇāya mahate dīyatāṁ paramārhaṇam evaṁ cet sarva-bhūtānām ātmanaś cārhaṇaṁ bhavet

sarva-bhūtātma-bhūtāya kṛṣṇāyānanya-darśine deyaṁ śāntāya pūrṇāya dattasyānantyam icchatā