Search

atha hetiḥ prahetiś ca pauruṣeyo vadhas tathā varyo vyāghras tathāpaś ca vāyur vidyud divākaraḥ

brahmāpetaś ca vipendrā yajñāpetaś ca rākṣakāḥ vāsukiḥ kacchanīraś ca takṣakaḥ śukra eva ca

elāpatraḥ śaṅkhapālas tathairāvata-saṁjñitaḥ dhanañjayo mahāpadmas tathā karkoṭako dvijāḥ

kambalo ’śvataraś caiva vahanty enaṁ yathā-kramam tumburur nārado hāhā hūhūr viśvāvasus tathā

ugraseno vasurucir viśvavasur athāparaḥ citrasenas tathorṇāyur dhṛṭarāṣṭro dvijottamāḥ

sūryavarcā dvādaśaite gandharvā gāyatāṁ varāḥ kṛtasthaly apsaro-varyā tathānyā puñjikasthalī

menakā sahajanyā ca pramlocā ca dvijottamāḥ anumlocā ghṛtācī ca viśvācī corvaśī tathā

anyā ca pūrvacittiḥ syād anyā caiva tilottamā rambhā ceti dvija-śreṣṭhās tathaivāpsarasaḥ smṛtāḥ

etā bhagavato viṣṇor ādityasya vibhūtayaḥ smaratāṁ sandhyayor nṝṇāṁ haranty aṁho dine dine

dvādaśasv api māseṣu devo ’sau ṣaḍbhir asya vai caran samantāt tanute paratreha ca san-matim

sāmarg-yajurbhis tal-liṅgair ṛṣayaḥ saṁstuvanty amum gandharvās taṁ pragāyanti nṛtyanty apsaraso ’grataḥ

unnahyanti rathaṁ nāgā grāmaṇyo ratha-yojakāḥ codayanti rathaṁ pṛṣṭhe nairṛtā bala-śālinaḥ

vālakhilyāḥ sahasrāṇi ṣaṣṭir brahmarṣayo ’malāḥ purato ’bhimukhaṁ yānti stuvanti stutibhir vibhum

evaṁ hy anādi-nidhano bhagavān harir īśvaraḥ kalpe kalpe svam ātmānaṁ vyūhya lokān avaty ajaḥ

śrī-śaunaka uvāca athemam arthaṁ pṛcchāmo bhavantaṁ bahu-vittamam samasta-tantra-rāddhānte bhavān bhāgavata tattva-vit

tāntrikāḥ paricaryāyāṁ kevalasya śriyaḥ pateḥ aṅgopāṅgāyudhākalpaṁ kalpayanti yathā ca yaiḥ

tan no varṇaya bhadraṁ te kriyā-yogaṁ bubhutsatām yena kriyā-naipuṇena martyo yāyād amartyatām

sūta uvāca namaskṛtya gurūn vakṣye vibhūtīr vaiṣṇavīr api yāḥ proktā veda-tantrābhyām ācāryaiḥ padmajādibhiḥ

māyādyair navabhis tattvaiḥ sa vikāra-mayo virāṭ nirmito dṛśyate yatra sa-citke bhuvana-trayam

etad vai pauruṣaṁ rūpaṁ bhūḥ pādau dyauḥ śiro nabhaḥ nābhiḥ sūryo ’kṣiṇī nāse vāyuḥ karṇau diśaḥ prabhoḥ