Search

sūta uvāca yaṁ brahmā varuṇendra-rudra-marutaḥ stunvanti divyaiḥ stavair vedaiḥ sāṅga-pada-kramopaniṣadair gāyanti yaṁ sāma-gāḥ dhyānāvasthita-tad-gatena manasā paśyanti yaṁ yogino yasyāntaṁ na …

pṛṣṭhe bhrāmyad amanda-mandara-giri-grāvāgra-kaṇḍūyanān nidrāloḥ kamaṭhākṛter bhagavataḥ śvāsānilāḥ pāntu vaḥ yat-saṁskāra-kalānuvartana-vaśād velā-nibhenāmbhasāṁ yātāyātam atandritaṁ jala-nidher nādyāpi viśrāmyati

purāṇa-saṅkhyā-sambhūtim asya vācya-prayojane dānaṁ dānasya māhātmyaṁ pāṭhādeś ca nibodhata

brāhmaṁ daśa sahasrāṇi pādmaṁ pañcona-ṣaṣṭi ca śrī-vaiṣṇavaṁ trayo-viṁśac catur-viṁśati śaivakam

daśāṣṭau śrī-bhāgavataṁ nāradaṁ pañca-viṁśati mārkaṇḍaṁ nava vāhnaṁ ca daśa-pañca catuḥ-śatam

catur-daśa bhaviṣyaṁ syāt tathā pañca-śatāni ca daśāṣṭau brahma-vaivartaṁ laiṅgam ekādaśaiva tu

catur-viṁśati vārāham ekāśīti-sahasrakam skāndaṁ śataṁ tathā caikaṁ vāmanaṁ daśa kīrtitam

kaurmaṁ sapta-daśākhyātaṁ mātsyaṁ tat tu catur-daśa ekona-viṁśat sauparṇaṁ brahmāṇḍaṁ dvādaśaiva tu

evaṁ purāṇa-sandohaś catur-lakṣa udāhṛtaḥ tatrāṣṭadaśa-sāhasraṁ śrī-bhāgavatam iṣyate

aṣṭādaśa purāṇāni kṛtvā satyavatī-sutaḥ bhāratākhyānam akhilaṁ cakre tad-upabṛṁhitam

lakṣaṇaikena tat proktaṁ vedārtha-paribṛṁhitam vālmīkināpi yat proktaṁ rāmopakhyānam uttamam

brahmaṇābhihitaṁ tac ca śata-koṭi-pravistarāt āhṛtya nāradenaiva vālmīkāya punaḥ punaḥ

vālmīkinā ca lokeṣu dharma-kāmārtha-sādhanam evaṁ sa-pādāḥ pañcaite lakṣās teṣu prakīṛtitāḥ

idaṁ bhagavatā pūrvaṁ brahmaṇe nābhi-paṅkaje sthitāya bhava-bhītāya kāruṇyāt samprakāśitam

brahmā devānāṁ prathamaḥ sambabhūva viśvasya kartā bhuvanasya goptā sa brahma-vidyāṁ sarva-vidyā-pratiṣṭhām atharvāya jyeṣṭha-putrāya prāha

ādi-madhyāvasāneṣu vairāgyākhyāna-saṁyutam hari-līlā-kathā-vrātā- mṛtānandita-sat-suram

sarva-vedānta-sāraṁ yad brahmātmaikatva-lakṣaṇam vastv advitīyaṁ tan-niṣṭhaṁ kaivalyaika-prayojanam

prauṣṭhapadyāṁ paurṇamāsyāṁ hema-siṁha-samanvitam dadāti yo bhāgavataṁ sa yāti paramāṁ gatim

rājante tāvad anyāni purāṇāni satāṁ gaṇe yāvad bhāgavataṁ naiva śrūyate ’mṛta-sāgaram

sarva-vedānta-sāraṁ hi śrī-bhāgavatam iṣyate tad-rasāmṛta-tṛptasya nānyatra syād ratiḥ kvacit